मुंबईत मुसळधार पाऊस चा तडाखा! शहर ठप्प, विमान-रेल्वे-रस्ते विस्कळीत; हजारो मुंबईकर त्रस्त.Havy Rain In Mumbai|

ताजा टाईम मराठी विशेष प्रतिनिधी | मुंबई | १८ ऑगस्ट २०२५

मुंबई… ही स्वप्नांची नगरी, जिथे प्रत्येक दिवस नवं आव्हान घेऊन येतो. पण आज, सोमवारी सकाळी, मुसळधार पावसाने मुंबईकरांचा जीवच मेटाकुटीला आणला.

आकाशातून कोसळणाऱ्या मुसळधार सरींनी संपूर्ण शहराला जलमय केलं.

रस्त्यांवर पाण्याचे तलाव साचले, लोकल रेल्वे उशिरा, विमानतळावर हाहाकार आणि वाहतूक ठप्प!

मुंबईत पावसाचा कहर इतका भयानक होता की, शहर जणू जलमय झालं. ऑफिसला जाणारे कर्मचारी, शाळेत जाणारी मुलं, आणि रोजच्या प्रवासात धडपडणारे मुंबईकर सगळेच अडकले. सामान्य माणसाच्या दैनंदिन जीवनाचा धागाच विस्कटला.

ताजा टाईम मराठीच्या विशेष टीमने शहरात फिरून घेतलेली माहिती आणि प्रत्यक्षदर्शींच्या प्रतिक्रिया घेऊन हा खास अहवाल तयार केला आहे.

विमानतळावर गोंधळ: ९ विमाने हवेतच, एक दुसरीकडे वळवलं

मुंबई आंतरराष्ट्रीय विमानतळ, जिथे नेहमीच गजबज असते, आज मात्र पावसाने थैमान घातलं. सकाळी ७ ते १० या वेळेत पावसाने दृश्यमानता इतकी कमी केली की, तब्बल ९ विमानांना लँडिंगच्या वेळी ‘गो अराउंड’ करावं लागलं. म्हणजे, विमान धावपट्टीजवळ येताच लँडिंग रद्द करून पुन्हा हवेत उड्डाण घ्यावं लागलं. एका विमानाची अवस्था इतकी बिकट झाली की, ते थेट अहमदाबादला वळवण्यात आलं.

कुर्ल्यात राहणाऱ्या राहुल देशमुख नावाच्या प्रवाशाने आम्हाला सांगितलं, “मी बंगळुरूहून येत होतो. विमान लँडिंगला तयार होतं, पण अचानक पायलटने सांगितलं की पाऊस आणि धुके यामुळे लँडिंग शक्य नाही. पायलेट ने सांगितले की,गो अराउंड करावे लागेल. कुटुंबीय घाबरले!” विमान कंपन्यांनी तातडीने फेरबदल केले, पण प्रवाशांचा त्रास वाढला. इंडिगो, विस्तारा आणि एअर इंडियाच्या विमानांना याचा मोठा फटका बसला. विमानतळ प्रशासनाने सांगितलं, “रनवेवर पाणी साचलंय, आणि सुरक्षेसाठी हे पाऊल उचलावं लागलं.”

रस्त्यांवर पाण्याचा कहर: सबवे बुडाले, वाहतूक कोंडी

मुंबईत पावसाचा सर्वात मोठा परिणाम रस्त्यांवर दिसला. अंधेरी सबवे तर पूर्णपणे पाण्याखाली गेला. लोखंडवाला, सायन, धारावी, चेंबूर, भांडुप या भागांत अक्षरश: रस्त्यांवर तलावाचे रूप आले. चेंबूरमध्ये ६५ मिमी आणि शिवाजीनगरमध्ये ५० मिमी पावसाची नोंद झाली. मोटरसायकल, कार आणि बस पाण्यात अडकल्या. काही ठिकाणी लोकांनी हाताने गाड्या ढकलल्या.

अंधेरीत राहणाऱ्या प्रियांका सावंत म्हणाल्या, “ऑफिसला जायचं होतं, पण सबवेत कमरेपर्यंत पाणी. मोटरसायकल बंद पडली. शेवटी रिक्षा घेतली, पण तीही पुढे गेली नाही. पायीच चालत गेले.” वेस्टर्न एक्सप्रेस हायवेवर तर गाड्यांच्या रांगा लागल्या. विलेपार्ले, अंधेरी, कांदिवलीत तासंतास वाहतूक कोंडी. ऑफिसला जाणारे कर्मचारी आणि शाळकरी मुलं अडकली.

मुंबई महापालिकेने पंपिंग स्टेशन सुरू केले, पण पावसाचा जोर इतका होता की, पाणी उपसणं कठीण होत आहे. पोलिस ट्राफिक नियंत्रित करण्याचा प्रयत्न करत आहेत, पण ड्रेनेज सिस्टम पुन्हा एकदा अपयशी ठरली. मुंबईकर विचारत आहेत, “प्रत्येक पावसाळ्यात हीच गत का?”

लोकल रेल्वे: मुंबईची लाईफलाईनही डगमगली

मुंबईची जीवनवाहिनी म्हणजे लोकल रेल्वे. पण आज पावसाने तिलाही हादरवलं. मध्य आणि पश्चिम रेल्वेच्या गाड्या १५ ते २० मिनिटे उशिरा धावत होत्या. ठाणे, डोंबिवली, कल्याणच्या रेल्वे ट्रॅकवर पाणी साचलं, ज्यामुळे गाड्या हळूहळू सरकत होत्या.

सोशल मीडियावर प्रवाशांनी संताप व्यक्त केला. डोंबिवलीत राहणाऱ्या संजय पाटील यांनी ट्विट केलं, “लोकल ४५ मिनिटे उशिरा. स्टेशनवर भिजत उभंय. रेल्वे प्रशासन काय झोपलंय का?” कल्याणच्या रीना जोशी म्हणाल्या, “मुलांना शाळेत सोडायला निघाले, पण गाडीच आली नाही. पावसात भिजून घरी परतलो.”

रेल्वे प्रशासनाने सांगितलं, “पाणी उपसण्यासाठी पंप सुरू आहेत, पण पावसाची तीव्रता कमी होईपर्यंत उशीर अपरिहार्य आहे.” मुंबईकरांसाठी लोकल हा रोजचा आधार, पण आज त्याचाही भरोसा ढासळला.